Дар варзишгоҳи марказии шаҳри Кӯлоб шоми гузашта, 5 уми октябри соли равон намоиши идонае баргузор гардид, ки гуфта мешавад, охирин таҷлил дар давоми як моҳи охир аз ҷашни Истиқлол буд.
Чорабиниҳои фарҳангӣ ва маданӣ дар ин байн дар саросари кишвар идома доштанд ва дар шаҳри Кӯлоб он ба финали худ расида, расман ҷамъбаст гардидааст. Дар намоиши идонаи шаҳри Кӯлоб Эмомалӣ Раҳмон ва фарзандону ҳамсараш ширкат доштанд, ки дар бари ӯ дар минбар меистоданд ва иди мардумро тамошо мекарданд
. 
Раисҷумҳур ҳангоми барномаи фарҳангии идона ба рақс омад ва дар суханрониаш бори дигар ба ҳодисоти ҷанги шаҳрвандӣ ишора кард ва таъкид намуд, ки имрӯз хеле шод аст, ки воқеоти солҳои 90 ум дар авроқи таърих мондаанд. Вай ба ташкилкунандагони ин ҷашн изҳори миннатдорӣ намуд ва баҳои баланд дод.
Ҳамчунин аз дафтари матбуоти президент хабар доданд, ки «бо ҳамин таҷлили ҷашни таърихии 25-солагии истиқлолияти давлатии Тоҷикистон, ки дар саросари кишвар бо дастовардҳои беназир бо барпо кардани чорабиниҳои гуногуни сиёсию фарҳангӣ қайд карда шуд, ҷамъбаст гардид». Вале маълум нест, он “дастовардҳои беназир” кадоманд, чун ишорае нашудааст.
Ин тавр ҷашни 25 солагии Истиқлоли Тоҷикистон бо рақсу бозии “Пешвои миллат” ба поён расид ва шабакаҳои телевизион онро ба таври мустақим намоиш доданд.
Гуфта мешавад, ки замоне Ислом Каримов, президенти мутаваффои Узбакистон дар чунин чорабиниҳо мерақсид ва ҳунари худро сол аз сол сайқал медод. Рақси ӯро телевизионҳои кишвар такрор ба такрор намоиш медоданд. Акнун ин амал ба Эмомалӣ Раҳмон сироят кардааст. Акнун Ислом Каримов дар ҳаёт нест ва вафот кардааст, аммо чунин ба назар мерасад, ки рақси ӯро дар Осиёи Миёна ҳамтои тоҷики вай идома медиҳад.
