Дар посух ба суоли корбаре бо номи Сайид Ҳамидов, ки дар бораи баргардонидани пулҳои баофшоррафта дар сурати ба қудрат расидани Паймони миллӣ пурсид, Муҳиддин Кабирӣ, раҳбари ПМТ гуфт ҳанӯз ҳам дер нашуда, ки хонаводаи раисҷумҳур пулҳои дуздидаашро ихтиёран ба кишвар баргардонад.
“Табиист, ки ин моли миллат ва сармояи миллат аст ва ин гуна таҷриба дар ҷаҳон ҳаст. Шумо шоҳиди он ҳастед, ки пулҳое, ки хонаводаи Ислом Каримов ба хориҷ, ба Урупо бароварда буданд, алъон баргардонида мешаванд ва аллакай як қисме аз ин маблағҳо ба Ӯзбекистон баргардонида шуданд аз бонкҳои Шветсия ва аз дигар бонкҳо. Пулҳое, ки Муаммар Қаззофӣ ба хориҷи кишвар бароварда буд, ба Либия баргардонида мешаванд. Пулҳое, ки Ҳусни Муборак бароварда буд, ба Миср баргардонида шудаанд. Ва табиист, ки он миллиардҳое, ки хонаводаи Раҳмон ба минтақаи офшор ба суратҳисобҳои пинҳонӣ бароварданд, онҳо як ба як доранд ошкор шуда истодаанд ва ҳатман баргардонида мешаванд” – таъкид кард раҳбари ПМТ.
Ӯ ҳамчунин гуфт дар сурати баргардонидани ин пулҳо Тоҷикистон на танҳо як Роғун, балки чандин ҷодаҳо ва роҳҳои бузургу кӯпрукҳо, садҳо бемористону мактабҳои ҷадид хоҳад сохт. “Ин сармояи миллат аст, ки аз тарафи як хонавода ба берун бароварда шуд ва яке аз вазифаҳои Паймони Миллӣ ҳам дар оянда ҳамин хоҳад буд” – гуфт Кабирӣ.
Раҳбари Паймони миллӣ гуфт бо истифода аз ин фурсат пешниҳоде ба худи Раҳмон ва хонаводааш дорад. Ӯ ироз дошт: “Қабл аз он, ки миллат вориди кор шавад, вақти он аст, ки ин пулҳоро ҳарчӣ зудтар худашон баргардонанд ва дар таърихи миллат ҳамчун як дузд боқӣ намонанд. Ҳоло чӣ зарурат аст, ки мо барои сохтмони Роғун пул қарз бигирем ва барои роҳҳо аз Чин қарз бигирем, ки то имрӯз мо бештар аз се миллиард доллар дар назди кишварҳои хориҷ қарздор шудем. Ҳар як шаҳрванди тоҷик, ки имрӯз, ё фардо таваллуд мешавад, бештар аз 300 доллар аллакай қарздор аст. Шумо ин пулҳои миллатро баргардонед ва ҳадди ақал каме аз ҷиноёти худро дар назди миллат соф кунед”.
Ба посухи ҳамин нафар дар бораи ҳали баҳсҳои сарҳадӣ дар сурати ба сари қудрат омадани Паймони миллии Тоҷикистон, Муҳиддин Кабирӣ посух дод:
Ин мавзӯъ хеле мавзӯи печида аст ва осон нест. Ҳукумати ҷумҳурии Тоҷикистон ва худи раҳбари ҷумҳурӣ имрӯз мутаасифона миллатро дар як вазъияти бисёр душвор қарор додаанд, ки як пораи хеле бузурги хоки ватанро ба кишвари ҳамсоя доданд. Бидуни он, ки як гуфтушуниди ҷиддӣ шавад. Пинҳонӣ аз миллат дар паси пардаҳо ин кор суръат гирифт ва маъмулан бояд, ки нисбати ин гуна масъалаҳои муҳим референдум баргузор шавад, миллат назарашро бигӯяд. Касе мехоҳад аз архиви парлумони Ҷумҳурии Тоҷикистон он сӯҳбатҳои ман дар парлумонро дар рӯзе, ки ин мавзӯъ дар парлумон баҳс мешуд, ман чӣ гуна бо вазири вақти хориҷаи Тоҷикистон ҷаноби Ҳамроҳхон Зарифӣ баҳсҳо доштам, метавонад пайдо кунад. Бояд ки ин масъалаҳо дигар хел ҳал мешуд.
Алъон бояд бигӯям, ки агар Паймон сари қудрат омад, бо ҳамсояи қавӣ ва бузурге мисли Чин кори осон нест, ки дар мавзӯи марзҳо баҳс кунем ва ба ягон натиҷаи дуруст расем. Аммо мо бовар дорем, ки ҳамсояи бузурги мо Чин вазъи миллати тоҷикро дарк хоҳад кард ва агар мо масъаларо ҳам, ки гузоштем, ҳамчун як нерӯи миллатдӯст, ватандӯст хоҳем гузошт. на барои он, ки бо ҳамсояи бузургамон Чин вориди муноқиша шавем ва инро ҳаққи табии худ медонем, ҳаққи миллат медонем. Исбот ҳам хоҳем кард, ки Э Раҳмон дар вақташ бидуни машварат бо миллат ин корро анҷом дод ва бояд ки аз миллати тоҷик назар мепурсид ва Паймон ин назари миллатро хоҳад пурсид. Аммо мо бо ҳеҷ ваҷҳ бо ҳамсояҳо вориди муноқиша ва ҷанҷолҳои ҷадид нахоҳем шуд. Ҳама бо роҳи гуфтушунид, аммо бо гуфтушуниди сарбаландона, қотеъона ва бо назардошти манфиатҳои миллӣ мо ин мушкилотро ҳал хоҳем кард.