Мусоҳибаи Шарофиддин Гадоев дар радиои “Паём”
Радиои Паём: Ҳодисаҳо ва сарусадоҳое зиёд дар атрофи рабуда шудану ба Ватан баргаштану аз Ватан баргаштани Шумо буд ва фазои маҷозӣ, як муддат аз ин мавзӯъ нафас мегирифт. Аммо мо акнун фурсате пайдо кардем, то дар ин бора сӯҳбати мустақиме ҳамроҳатон анҷом диҳем. Аввал суоле доштам, ки бо кадом тасмим хаёли сафари Русия доштед?
Шарофиддин Гадоев: Дуруду паём бар шунавандагони радиои Паём! Сабаби ба Русия сафар кардани ман, ки санаи 13-уми феврали соли 2019 ба вуқӯъ пайваст, дидору гуфтушунид бо бархе аз мақомдорони Русия буд ва мақсад роҳандозӣ кардани баъзе барномаҳои мушаххас , ки вобастагӣ дошт ба Ҷунбиши Мардумии Ислоҳот ва Рушди Тоҷикистон. Мо мехостем, ки дар Русия як диаспораи тоҷикон, яъне намояндагии расмии тоҷиконро дошта бошем ва ҳамкориҳои судманде бо муҳоҷирон пойдор бошад, чун дар арафаи ин ду интихоботи дар пеш истодаи парлумонӣ ва президентӣ қарор дорем. Шумо бубинед, ки кишвари мо бо Русия ниҳоят алоқаманд аст, зиёда аз ду миллион муҳоҷири кории тоҷик дар русия кору фаъолият мекунад. барои мо муҳим буд, ки шароити имрӯзаи Тоҷикистонро ба мақомдорони Русия фаҳмонем. То онҳо имрӯз аз он ҳимояте, ки нисбати Режими Раҳмонов мекунанд, даст бардоранд. Ва имконият диҳанд, ки шаҳрвандони Тоҷикистон ҳам тавонанд, ки ҳам дар интихоботи парлумонӣ ва ҳам дар интихоботи президентӣ иштирок кунанд.
Радиои Паём: Шароити сиёсии Русия ба ҳама маълум буд ва қаблан ҳам чандин нафарро аз Русия дуздида бурда буданд. Дар ҳамин ҳолат Шуморо чӣ бовар кунонида тавонист, ки бо вуҷуди дарки хатар ҳам, ба Русия сафар кунед? Магар бароятон дарси ибрат набуд паёмади беэҳтиётии Мақсуд Иброҳимов, ё худ Муҳаммадрӯзӣ Искандаров, ки аз Русия рабуда шуда буданд?! Чаро қазияи онҳо дарси ибрат нашуд, ки рахти сафари Русия бастед?
Шарофиддин Гадоев: Ростӣ, ман фикр доштам, ки Русия сиёсаташро нисбати Тоҷикистон тағйир додааст, зеро он омилҳое, ки барои ноором кардани минтақаи Осиёи Миёна ҳаст, дар режими Раҳмонов дида мешавад. Ва низ хатарҳое, ки режими кунунӣ дар худи минтақа ба вуҷуд овардааст, бо гурӯҳҳои радикалу нерӯҳои сиёсӣ даҳҳо маротиба аз он хатарҳои марзии таҳдидкардаистода зиёдтар аст. Тоҷикистонро ба як ҳоли пурхатар оварданаш мумкин аст. Ин ҳам зарари молӣ ва ҳам зарари амниятист. ба ҳамин хотир ҳам мо мехостем, ки ҳукумати Русия сиёсаташро комилан бо Тоҷикистон тағйир диҳад. Мо фикр кардем, ки аллакай ин ҳамаро Русия омӯхтааст ва самти сиёсиашро дигаргун сохтааст, аммо мутаасифона чунин набуд.
Дар ҳақикат ҳам чун имрӯз режими Раҳмонов Тоҷикистонро табдил додааст ба як минтақаи транзитӣ барои қочоқи маводи мухаддир, албатта ба иқтисоду амнияти Русия ҳам таъсири манфии худро мерасонад ва миллиардҳо доллар зарар меоварад. Фикрам ин буд. ки ин ҳама зарарҳоро ҳукумати Русия нисбати худ ҳисоб карда баромадааст ва дигар пуштибонӣ аз режими Раҳмонов намекунад. имрӯз мухолифини ҳукумати Раҳмонро мақомоти амнияти Тоҷикистон дар ҳамдастӣ бо мақомоти амниятӣӣ Русия саркӯб карда истодаанд. Ниятам ин буд, ки лоақал аз саркӯбии мухолифини Тоҷикистон Русия даст бардорад. Имконият диҳанд, ки он ҳаққи шаҳрвандие, ки дар Тоҷикистон барояшон маҳдуд буд, ин ҷо фароҳам кунанд, то тавонад чорабиниҳои сиёсие гузаронанд ва дар он кишвар ҷойгоҳи худро дошта бошанд. Дар асоси қонун мо аз онҳо зиёд талаб ҳам накардем ва мунтазир ҳам набудем.
Радиои Паём: Кадоме аз мақомоти Русия мутақоидатон кард, ки дар ҳоли сафар хатаре бароятон таҳдид намекунад?
Шарофиддин Гадоев: Намояндаи мақомоти амниятии Русия буданд, ки бехавфии сафарро кафолат доданд ва бо сабабҳои муайян ҳоло ному насабашонро махфӣ медорам ва вақту соаташ фаро расад, албатта аниқ хоҳам гуфт. Аммо ҳанӯз бигузор пӯшида монад. Фурсате ҳоло меояд, ки гуфтанаш зарур мегардад ва ҳатман мегӯем.
Радиои Паём: Пас, вақте, ки Шумо ба Русия сафар кардед, мулоқотҳо дар чӣ гуна фазо доир шуданд? Чӣ гуфтушуниде ба миён омад?
Шарофиддин Гадоев: Гуфтушунид чунин буд, ки мо хоҳиши худро расонидем ва талабамон ин буд, ки як созмони ҳуқуқӣ дошта бошему як диаспораи тоҷикӣ, то як маркази ҳамоҳангсозӣ бошаду мавқеи ҳамкорӣ бошад. Ҳамроҳи ҳамрайъони худ як кору амали муштараке дошта бошем. Мо медонистем, ки дар Русия бақайдгирии ҳамчунин як созмонҳо ин ба иҷозати мақомоти амнияти Русия сурат мегирад. Агар ин корамон як иқдоми хурдакак дар ягон ноҳияву шаҳрак мебуд, гапи дигар буд. Аммо чун мо дар як Русия хостем ташкилоте дошта бошем, наметавонем бе иҷозаи расми корро ифтитоҳ бахшем. Агарчи як кишвари бузург аст Русия, аммо тамоми он коре, ки дар роҳи сиёсат роҳандозӣ мешавад, бояд бо иҷозаи мақомот пиёда шавад.
Радиои Паём: Оё дар рафти гуфтушунид ишорае лоақал буд, ки Шумо бозошт мешавед ва ба Тоҷикистон истирдод мекунанд?
Шарофиддин Гадоев: Не, аслан дар ин мавзӯъ сӯҳбат ҳам надоштем ва ёди ин мавзӯъ ҳам набуд. Мавзӯи мо фақат дар атрофи ҳуқуқҳои муҳоҷирон, амнияти минтақа, ва амнияти худи муҳоҷирон буд. Берун аз ин чизе зикр нашудааст. Ягон ҳаракати таҳдидомез, ё сӯҳбатҳои шубҳаовар дар атрофи мо набуд.
Радиои Паём: Худи Шумо дар ҳоли машварат ҳамроҳашон ягон хатар эҳсос кардед, ки шояд ба Тоҷикистон истирдод мекунанд?
Шарофиддин Гадоев: Фақат суоле буд, ки агар рафту муқовимати Шумо шадид шуд бо ҳукумати Тоҷикистон ва ин муқовиматҳо ба ягон ҳолати бенизомӣ оварда расонад, шумо чӣ кор мекунед? Мо ҷавоб додем,ки албатта мо ҳеҷ гоҳ тарафдори ҷанг нестем, тарафдори гуфтушунид ҳастем ва ҳамеша омодаи гуфтушуниди мусолиматомезем. Аммо афсӯс, ки имрӯз ҳукумати Тоҷикистон омода нест, ки гирди мизи муросо нишинаду атрофи манфиатҳои миллӣ андешад.
Радиои Паём: Суоле дигар ба миён омад, ки оё ҷониби мухолифин, умуман Паймони Миллии Тоҷикистон ё худ ҷунбиши Ислоҳот ва Рушди Тоҷикистон, ки Шумо сарвариашро бар дӯш доред, оё хоҳиши онро дорад, ки як чунин гуфтушунидҳо бо раҳбарияти феълии Тоҷикистон анҷом диҳад?
Шарофиддин Гадоев: Агар гуфтушунидҳо дар доираи манфиатҳои миллӣ сурат гиранд, ҳукумати кунунии Тоҷикистон омода бошад, ки дар ҳақиқат ҳам дар сатҳи миллӣ мулоқоте анҷом диҳем, албатта омодаем.
Радиои Паём: Сатҳи миллӣ гуфта чиро дар назар доред, яъне дар кадом доира бояд гузаронида шавад?
Шарофиддин Гадоев: Яъне он қонунҳое, ки ғайриқонунӣ қабул карда шудаанд, он қарорҳое, ки мутобиқат ба меёрҳои санадҳои ҳуқуқи байналмиллалӣ намекунанд, ба манфиати давлату миллат нестанд, онҳо ҳама бекор карда шаванд. Салоҳиятҳои президент кам карда шавад.
Радиои Паём: Аммо то чӣ андоза ин талаботи шумо мантиқӣ аст барои нафаре,ки дар сари қудрат боқӣ мондан мехоҳад ва ин ҳама қонунҳоро ба манфиати худаш қабул кардааст? Ва нафаре, ки бо тамоми ҷидду ҷаҳд сари курсӣ мустаҳкамиашро меандешад, чи гуна метавонад, ки берун аз худаш манфиатҳои миллиро андешад?
Шарофиддин Гадоев: Ин, ки ҳукумат намехоҳад бо мухолифонаш, бо рақибонаш гуфтушуниде анҷом диҳад, сабаб ин аст, ки онҳо хеле хуб медонанд, ки он талаботе, ки мо мекунем, аз ӯҳдаи анҷом додан намебароянд.
Радиои Паём: Пас, умед ба гуфтушунид чӣ маъно дорад?
Шарофиддин Гадоев: Умеди мо ба он хотир аст, ки мо дар ҳама ҳолат ба гуфтушунид омода ҳастем, бо ҳар нафаре, ки бошад, ҳатто бо Эмомалӣ Раҳмон, ё шояд фардои дигар Ятимов мешавад, ҳар касе ки бошад.
Радиои Паём: Аммо роҳбари ПМТ Муҳиддин Кабирӣ гуфтанд, ки мо бо хоин сулҳ намекунем, бо хоин гуфтушунид ҳам намекунем дигар. Шумо мегӯед, ки мо ба гуфтушунид омода ҳастем. Инро чи гуна фаҳмидан мумкин?
Шарофиддин Гадоев: Дуруст аст, ки бо хоин сулҳ намекунем. Пеш аз ҳама мо бо касе ҷанг ҳам накардаем, ки сулҳ кунем. Гуфтушунид ин ҷо ба маънои сулҳ карданамон ҳам нест, зеро дар он аз сари қудрат рафтани Эмомалӣ Раҳмон ба миён гузошта мешавад. Масъалаи озод кардани зиндониёни сиёсӣ ба миён гузошта мешавад. Бо роҳи демократӣ як кишвари қонунмеҳварро мо ба миён мегузорем. Ҳукуматдорони Тоҷикистон аз он корҳои ғайриқонуние, ки имрӯз анҷом дода истодаанд, бояд, ки даст кашанд. Масъалаи хешу таборбозӣ, қавмбозиашонро ба миён мегузорем. Инчунин масъалаи боло бурдани салоҳияти додгоҳҳоро ба миён мегузорем. Мо инро хуб медонем, ки ба ин ҳама манфиатҳои мардумӣ, ки зидди Раҳмонов аст, ҳеҷ гоҳ Раҳмонов розӣ намешавад.
Радиои Паём: Пас, чӣ хел метавонед гуфтушунид кунед?
Шарофиддин Гадоев: Муҳим мо омода ҳастем.
Радиои Паём: Магар мешавад, ки дар гуфтушунид боз Раҳмонов раисҷумҳур бимонад?
Шарофиддин Гадоев: Не ин имкон надорад!
Радиои Паём: Чигуна метавонед ӯро бо роҳи гуфтушунид аз сари қудрат дур кунед, дар ҳоле, ки ба тамоми қувва, тамоми имкониёташро сафарбар намудааст, то бар тахт бимонад?!
Шарофиддин Гадоев: Аввалан бояд Раҳмонов омодаи чунин гуфтушуниди қонунӣ бошад. Баъдан талаботҳои мо муайян ва мушаххас аст. Раҳмонов бояд аз сари қудрат биравад. Агар Раҳмонов мехоҳад, ки дар Тоҷикистон мардум осуда бошанд, обод бошанд, ҷанг нашавад, пас бояд аз сари қудрат биравад. Зеро кафили ин ҳама ҳолат рафтани Раҳмонов аст. Ҳамаи бадбахтиҳое, ки мардум то ин дам дорад, бо сабаби Раҳмонов боқист.
Радиои Паём: Бо кадом далел?
Шарофиддин Гадоев: Далел ин ки дар сари ҳукумат ӯ ғайриқонунист
Радиои Паём: Аммо агар гӯяд, ки сулҳро ман овардам, тинҷиву осудагӣ аз ман аст, шукрона кунед, ки чунин Ватани ободу зебо доред. Яъне ин ҳама дастоварди ман аст.
Шарофиддин Гадоев: Бубахшед бародари азиз, ин худаш омадани Раҳмонов як ҷанг буд. Мову Шумо хуб медонем, ки дар пушти Эмомалӣ Раҳмонов афсарони рус буданд, афсарони ӯзбек буданд, ки бо роҳбарии президенти он давра Каримов буд, идора мешуд ва худи Раҳмонов як ҷосус буд дар вақташ. Чи гуна як нафар хоин, ки бо танку тӯпи бегонагон вориди кишвар шуду миллионҳо нафарро кушт, метавонад асосгузори сулҳ бошад? Сулҳовару сулҳофар бошад?! Агар онҳо сулҳ ҳам карданд, дар асоси манфиатҳои худашон сулҳ карданд. Дар асоси манфиатҳое, ки онҳо наметавонистанд муқовимат кунанд. Аз як тараф Русия маҷбур мекард, аз тарафи дигар Раҳмонов дар иҳотаи мухолифони худ қарор дошт. Каримов президенти Ӯзбекистон ҳеҷ гоҳ намехост, ки дар Тоҷикистон сулҳ шавад.
Радиои Паём: Ин таърихи ба ҳама маълум аст. Бармегардем ба масъалаи рабуда шудани худи шумо. Чи тавр шуд, ки шумо якбора дар Тоҷикистон пайдо шудед?
Шарофиддин Гадоев: Ман дар сӯҳбатҳои қаблӣ ҳам гуфтам,ки чӣ гуна маро дуздиданд ва чи гуна ба Тоҷикистон маҷбуран оварданд, дар сӯҳбатҳои алоҳида ҳам, дар конфронси васоити ахбори омма гуфта будам ва навораш ҳам ба ҳама маълум буд. Мо бо як нафар аз дастгоҳи президент барои мулоқот ба Русия мерафтем ва дар меҳмонхона будем, ки моро бо роҳи фиреб бароварданд.
Радиои Паём: Кӣ шуморо аз меҳмонхона баровард?
Шарофиддин Гадоев: Ҳамон нафароне, ки бояд амнияти маро дар русия таъмин мекард, ҳамонҳо буданд.
Радиои Паём: Яъне онҳо шуморо фурӯхтанд?
Шарофиддин Гадоев: Не, ин муомила ба фикрам дар сатҳи раҳбариятҳои кишвар сурат гирифта буд ва чун онҳо фикр карданд, ки маро бо ин роҳ метавонанд ба Тоҷикистон баранд. Ин ҷо барои дуздидани ман 3-4 сохтор иштирок кардааст ва барои ба кор бурдани ин 3-4 сохтор бояд, ки раҳбарияти кишвар иҷозат дода бошад. Ман фикр мекунам, ки ин кор дар сатҳи роҳбариятҳо ҳал шудааст. Зеро ки вақте ман бо худи Ятимов ҳамсӯҳбат шудам, ӯ гуфт, ки барои овардани шумо ба Тоҷикистон худи пешво сару кор гирифтааст. Ин қудратро пешво дорад ва ман надорам.
Радиои Паём: Шумо гуфтед, ки боздошти шумо дар сатҳи роҳбариятҳои кишвар ҳал шудааст ва бо роҳи гуфтушуниди сарони ду кишвар шумо боздошт ва ба Тоҷикистон истирдод шудед. Бисёр хуб, бигузор чунин бошад. Аммо вақте ки як нафар бо гуфтушуниди сарони ду кишвар боздошт мешавад, истирдод мешавад, аллакай ӯ шахси кӯчаке ҳам нест. Дар нақлҳоятон тариқи расонаҳо гуфтед, ки маро боздошт карданд ва ба сарам салафан печиданд ва аз болояш скотчпеч карданд, як қабати дигар, ва ба дастонам завлона заданд. Лекин дастони шуморо на аз пушт , балки аз пеш бастанд, то тавонед фурсате пайдо карда салафанро даронда онҳоро бинед ҳам. Инро чи хел бовар кардан мумкин аст?
Шарофиддин Гадоев: Вақте ки мо дар дохили минивен нишаста будем, маро дар дохили ҳамон мошини сафед -минивен завлона заданд, яъне маро дар кӯча дастгир накарданд. Дар чунин ҷойҳо агар одамро дастгир кунанд, албатта дастонашро аз пеш завлона мезананд. Агар дастгиркунӣ дар берун сурат гираду ягон шахси ҷинояткор бошад, шояд дасташро аз пушт банданд.
Радиои Паём: Норӯшан аст, ки шахсеро масъулини мақомоти низомӣ боздошт кардаанд, ки ҳодиса бо фармони роҳбарият суръат гирифтааст, аммо ашёи истифодашуда барои панаҳ кардани рӯй ва маҳкам кардани дастонаш лоақал ба талаботи ин ҳама даҳмасаи фармони роҳбарӣ мувофиқа намекунад, яъне метавонад, салафани рӯяшро бемалол даронда сӯҳбат ҳам кунад. Ҳатто даҳонашро набастаанд. Чӣ хел бовар кардан мумкин?
Шарофиддин Гадоев: Ман гуфтам, ку аввал скотчро ба даҳонам бастанд ва баъдан ин халтаи сиёҳро аз болояш кашиданд ва баъдан аз болояш боз скотч часпиданд. Ин саволро шояд ба мақомотҳои Русия диҳед, ки бароятон ҷавоб диҳанд.
Радиои Паём: Аввал шуморо ба кадом фурудгоҳ бурданд?
Шарофиддин Гадоев: Ба фурудгоҳи Домодедово бурданд
Радиои Паём:Аз куҷо фаҳмидед, ки фурудгоҳ Домодедово ном дорад?
Шарофиддин Гадоев: Дар вақти парвоз эълон карданд
Радиои Паём: Шумо бо як изҳороти шубҳабарангези худ дар тоҷикистон пайдо шудед ва дар он изҳорот гуфтед, ки ман бо хоҳиши худам омадам ва пештар бо Вазорати корҳои дохилӣ дар ин бора гуфтушунидҳо буд ва дар натиҷаи ин гуфтушунидҳо ман омадам. Он ҷо шумо дурӯғ гуфтед?
Шарофиддин Гадоев: Ин ҳама гуфтор таҳти фишор ва шиканҷа сурат гирифтанд ва он чизе, ки онҳо мехостанд, ки бар ивази озод шуданам диҳам, ва ин лаҳзае буд, ки ман бояд сабаби пайдо шудани худро дар Тоҷикистон нишон медодам ва ба бозии онҳо ворид мешудам ва баъдан тибқи ҳамон бозиҳо бояд агар имконият шавад, дар камтарин фурсат аз Тоҷикистон фирор мекардам.
Радиои Паём: Яъне он изҳороте, ки дар навор бо хоҳиши кормандони ВКД кардед, ин танҳо ба он хотир буд, ки аз худ дарак диҳед, ки дар Тоҷикистон ҳастед?
Шарофиддин Гадоев: Бале, чун ман хотири ҷамъ доштам, ки як видеои дигаре дорам ва дар нақши гуфтаи онҳо ҳам бозидам, зеро мақомоти Русия ва Тоҷикистон дар ин ҷиноят даст доштанд. Ман бошам мехостам, ки ҷомеаи ҷаҳонӣ аз ин ҷиноёташон огоҳ шавад. Ин барои мо муҳим буд, чунки бояд аз ҷомеаи ҷаҳонӣ аз ҷиноятҳои ду кишвар бохабар мешуданд.
Радиои Паём: Якчанд собиқ ҳамандешаҳоятон, ки айни ҳол дар Тоҷикистон қарор доранд, ва ҳамвора даъват мекунанд, ки мухолифин пушаймон шуда ба Ватан бозгарданд ва шуморо ҳам яке аз пушаймон шуда бозгаштаҳо ҳамон рӯзҳо ҳисоб мекарданд, эълон карданд, ки ҳамон нафарон бо шумо дар тамос буданд, ва чанд рақамҳои шуморо чун далел нишон доданд, ки дар ҳақиқат тамос гирифтаед. Гӯё борҳо сӯҳбат ҳам доштаед, ки ҳатман боз мегардед ва онҳо ба шумо раҳнамоӣ карданду шумо бозгаштед. Дар ин бора чӣ гуфта метавонед?
Шарофиддин Гадоев: Не, ин гуфтаҳо асос надоранд. инҳо аз пеши худашон ҳам чунин корро намекунанд, зеро ҳар чизе, ки Шоҳрух Саидов барояшон фармудааст, ҳамон кор иҷро мешавад. Чунки ин командаи 17 нафарае, ки аз гурӯҳи 24 бо заҳматҳои зиёд оварда шудаанд. Инҳо ҳамон собиқ опозитсия ҳастанд ва Шоҳрух Саидов тавассути ҳаминҳо мехоҳад суханашро расонад. Маҷбур астанд, ки иҷро кунанд, зеро ҳамвора дар назоратанд.
Радиои Паём: Чи гуна то ин ҳад бечорагӣ ва хориву зориро ихтиёр кардаанд, ки масалан гӯем як шахси соҳибмаърифат бемалол ба мардум дурӯғ мегӯяд, фиреб мекунад ва як нафаре, ки бо зулм боздошт шудааст, бо зулм истирдод шудааст ва дар зери фишор қарор дорад, мегӯянд бо хоҳиши худаш омадааст?!
Шарофиддин Гадоев: Ростӣ ман наметавонам ба ҷойи онҳо ҷавоб гӯям. Фикр мекунам, ки онҳо шояд ягон вобастагӣ доранд?! Шояд ба ин ақидае расидаанд, ки ҳама бояд баргарданду дар паҳлӯи ҳукумат бошанд?! Аммо ин роҳи онҳост, ҳаққи интихоб аз онҳост. Дар мавриди дурӯғ гуфтанашон , ба хаёлам ягон маҷбуриву вобастагӣ доранд.
Радиои Паём: Пас изҳороти шумо маҳз ба хотири аз худ дарак доданатон буд. Дигар камтар дар бораи хабарнигор Лидия Исамова ва мусоҳибаатон бо ӯ равшанӣ меандохтед.
Шарофиддин Гадоев: Худи ҳамон рӯзи 15-ум тахминан соатҳои 4 буд, ё 5-и бегоҳ , ки дар расонаҳои хабарии шабакаҳои иҷтимоӣ сару садоҳо баланд шуданд, ки гӯё ман бо хоҳиши худ барнагаштаам ва дуздида шудаам. Онҳо ҳам хостанд, ки дар ин маврид бояд як расонаи маълум бо ман мусоҳиба гирад ва хабар диҳад, ки бо ман вохӯрдааст ва дар озоди ҳастам ва ҳеҷ мушкилие надорам. Маро он вақт аз идораи Раёсати кофтукоби ҷиноии назди вазорати корҳои дохилӣ гирифта, ба ҳамон шӯбаи корҳои дохилие, ки дар назди фурудгоҳ ҳаст, ба ҳамон ҷо бурданд. Дар он ҷо бо Лидия Исамова сӯҳбат анҷом додем. Генерал ба ман гуфт, ки ҳар он чӣ мо ба шумо мегӯем, ҳамонро дар назди журналист мегӯед. Яъне шумо бо хоҳиши худатон ба ин ҷо омадед ва дигаронро ҳам даъват мекунед, ки баргарданд. Вақто сӯҳбатамон бо Лидия Исамова ба охир расид, дидам,ки дар ҳамон роҳрав бо домоди Рамазон Раҳимзода хайрухуш мекарданд ва дар ҳамон ҷо дидам, ки 500 рубл буд, ё сомон, ё доллар, кадом асъор буд намедонам, ба хабарнигор доданд. Маълум, ки мутобиқи шартномаи гуфтаашон аст. Баъд ба Лидия Исамова ронанда пешниҳод карданд, то бурда расонад.
Радиои Паём: Дар бораи изҳороти қабл аз сафаратон пурсиданиам, чун шумо қабл аз баромадан ба сафар сабти изҳороте ба рӯзи мабодо доштед. Аҳамият дода бошед, дар оғози сӯҳбат пурсида будам, ки то чӣ андоза бовар доштед, ки сафари Русия бароятон бехатар аст, аммо посух додед, ки аз ниҳодҳои махсусанд ва шахсони махсусанд аз шӯрои амнияти Русия ва бовар кунониданд, ки ба Русия сафар кунед. Локин бо вуҷуди ин ҳама бовар, шумо садои худро сабт карда гузоштед, ки дар ҳолати дуздидаву рабуда шудан, кушта шудан ва дигар ҳодисаҳои пешомада , ҳар он ҷи мегӯед, аз рӯйи маҷбурист. Аз ин рафтор мебарояд, ки хатарро эҳсос мекардед?!
Шарофиддин Гадоев: Ин қабил хатар ҳамеша буд ва мо наметавонем онро нодида гирем, чунки дар ин давлат таҷрибаи рабудани мухолифони тоҷик хеле зиёд аст ва кушта шудан, ё дуздида шудану бедарак шуданҳо хеле зиёд аст. Ба ҳамин хотир мо рӯзи мабодои чунин ҳолатро фикр карда , сабти қаблӣ гузоштем,зеро зарар ҳам намекард ин эҳтиётамон. Омода ҳам будем, ки ин ҳолат рух доданаш мумкин аст. медонистем ҳам.
Радиои Паём: Ин сабтро дар сафари пешина гузошта будед, ё қабл аз ҳамин сафаре, ки ҳодисаҳо рух доданд?
Шарофиддин Гадоев: Ҳар ду дафъаи сафар ҳам сабти навор доштам. Ғайр аз ин буданд боз наворҳои дигаре, ки ин изҳоротро пурратар мекарданд. Ва мақсад он буд, ки агар баъди пахши навори аввал маро раҳо накунанд, навори дигараш ҳам пахш карда мешавад. Нақшаи дигарамон чунин буд.
Радиои Паём: Дар он ҳолатҳои боздошт шумо ягон роҳи тамос бо пайвандонатон ё ҳамандешагон, ки дар Аврупоянд, доштед?
Шарофиддин Гадоев: Мустақиман надоштам, аммо тариқи шахсони алоҳида буд.
Радиои Паём: Чи хабарҳоеро мерасонидед? Кадом вақт бароятон муяссар шуд, ки аз худ хабар диҳед, ки бо ҳамкории ВКД Тоҷикистон нарафтаед, балки дуздида бурданд? Оё ба роҳбарияти Паймони Миллӣ бо ягон роҳ гуфта будед, шумо дуздида шудаед?
Шарофиддин Гадоев: Зарурати ин суханҳоро гуфтан ҳам набуд, зеро худашон медонистанд. Масъалаҳои дигаре буданд, ки тариқи ашхоси наздик ба роҳбарият мерасонидам ва бо маслиҳат кор мегирифтем, ки чи роҳе дурусту чи кореро кардан мумкин нест.
Радиои Паём: Кадом нақшаҳои ҳукумат бароятон ифшо шуд?
Шарофиддин Гадоев: Нақшаи ҳукумат ин буд, ки ман раваму роҳбарии “Гурӯҳи 24”-ро, ки дар он ҷо 17 нафар ҷамъ шудаанд, бар дӯш гирам. Бароям имкониятҳои молӣ ҳам пешниҳод мекарданд.
Мо дар он ҷо созмони худро бояд дуруст мекардем ва дигар аъзоёни “Гурӯҳи 24”-ро низ ба сафамон даъват мекардем. Низ ҷавонони дар Анҷуман, Ҳизби Наҳзат ва гурӯҳи Ислоҳот, ин ҳамаро бояд ба бозгашт даъват менамудем.
Бо ҳамон гурӯҳи 17-нафара чунин фаъолиятҳои сиёсӣ бурда то давраи интихоботи соли 2020 идома медодем ва баъдан сиёсати Эмомалӣ Раҳмонро ҳамчун як ҷавон дастгирӣ мекардем. Нақшаи моро истифода бурдани ҳукумат чунин буд.
Радиои Паём: Оё он рӯзҳои дар Ватан буданатон бо Саймӯъмин Ятимов раиси кумитаи амнияти миллии Тоҷикистон ҳам мулоқот доштед?
Шарофиддин Гадоев: Бо намояндаи Ятимов дар соли 2018 ҳамсӯҳбат шуда будем ва масоили зиёде мавзӯи сӯҳбатамон буд. Ба ман супориш ҳам доданд, ки кадом корҳоеро анҷом бояд диҳам бар ивази дар Тоҷикистон озодона зистан. Кафолат ҳам доданд барои озодиам. Он намоянда Маҳмадалӣ Расулов буд, ки худаш ба Олмон омада буд. Саймӯъмин мехост, ки мо дар интихоботи соли 2020 иштирок кунем ва бачаҳои мухолифро ба Ватан баргардонем ва муқовимате, ки ҳоло бо ҳукумат дорем, хотима бахшем.
Радиои Паём: Гуфтаҳоятон аз он дарак медиҳад, ки дар интихоботи соли 2020 Эмомалӣ Раҳмон номзадиашро ба президентии кишвар намегузорад, балки писараш Рустам номзади минбаъда аст?
Шарофиддин Гадоев: Бале! Ин нақша сад дар сад аст ва аллакай бо он ҷавононе, ки ман вохӯрдам, Рустамро ҳамчун президенти оянда медонанд ва чун президенти оянда муносибат ҳам мекунанд. Шахсе, ки мардум ҳоло феълан интихоб накардааст, вале онҳо ӯро аллакай чун президент медонанд. Тақдири президенти ояндаи кишвар дар дасти як гурӯҳ аллакай ҳалли худро ёфтагӣ аст.
Радиои Паём: Миш-мишҳое ҳам буд, ки гӯё бо Рустами Эмомалӣ низ мулоқот доштед, аммо шумо дар сӯҳбатҳоятон инро рад кардед. Оё чунин вохӯрӣ буд?
Шарофиддин Гадоев: Рӯзи 23-юм субҳ генерал майор Бекназаров омаданд ва пешниҳод карданд, ки имрӯз имкон ҳаст бо Рустами Эмомалӣ вохӯред. аммо ман ин вохӯриро рад кардам. Гуфтам, ки ҳар чӣ президент ва раиси кумитаи амният гуфтааст, ман бовар дорам ва ҳоҷати бо Рустам вохӯрдан нест. Ман омода ҳастам, ки бо шумо кор кунам.
Радиои Паём: То чи андоза ин тасмими шумо дуруст буд? Магар намешуд, ки бо ӯ
низ ҳамчун як сиёсатмадор вохӯрӣ анҷом медодед ва аз баъзе услубҳои кориашро мефаҳмидед.?
Шарофиддин Гадоев: Ман Рустамро нағз мешиносам ва тактикаи кориашро низ медонам ва то чи андоза донишу малака доштанашро низ. Мо чандин маротиба вохӯрда ҳам будем. Ба варзишгоҳи Спартак барои бозӣ меомад ва медидем ҳамдигарро. Охирин маротиба бо ӯ дар утоқи кориаш дар кумитаи гумрук вохӯрда, дар мавриди баъзе мушкилоти гумрукӣ сӯҳбат хам карда будем. Барои ҳамин ҳам ҳоҷати бо ӯ гуфтугӯ набуд, зеро медонистам, ки дар кадом сатҳ аст.
Радиои Паём: Дар баъзе гуфтор аз амалиёте бо номи “Ватан” ишора кардед. Ин чи амалиётест?
Шарофиддин Гадоев: Ин ҳамон амалиёт аст, ки бояд то давраи интихоботӣ мерафт . Ва ҳамон роҳбарӣ кардани гурӯҳи 24 ва баргардонидани мухолифин ба Ватан ва то гузаштани интихобот корро пеш бурдан буд.
Радиои Паём: Сохтори ин амалиёт чи гуна буд?
Шарофиддин Гадоев: Киҳо дар амалиёт иштирок мекунанд, намедонам. Бароям ҳамин қадараш аён буд, ки бо кумитаи амният ва ВКД ҳамкорӣ пеш барам. Нақши ман иштирок дар конфронсҳо ва даъвати ҷавонон буд.
Радиои Паём: Нафароне,ки корманди кумитаи амнияти миллӣ ҳастанд ва ҳоло дар Аврупо қарор доранд барои анҷоми баъзе корҳои пинҳониашон, ва бархеро виҷдон бедор шуда худро ифшо ҳам карда истодаанд, ки дигар корманди ин ниҳод нестанд, оё аз онҳо ҳам шомили ин амалиёт ҳастанд?
Шарофиддин Гадоев: Ин амалиёт танҳо дар дохили Тоҷикистон пурра роҳандозӣ шудааст. Аз амниятиҳои берунбуда касе шомил нест. Дар ин амалиёт бояд ҷонибдорӣ шавад сиёсати пешгирифтаи раисҷумҳур ва эҳтиёткорона танқид шавад баъзе сиёсатҳои дигари дохила. Ва ба ғайр аз ду нафар-Рустами Эмомалӣ ва эмомалӣ Раҳмон мо ҳақ доштем, ки ҳар нафари дигарро бар корашон эрод гирем. Танҳо ин ду нафар дастнорас буданд. Ҳатто барои танқиди ғайри ин ду нафар, қаблан бояд бо кумитаи амнияти миллӣ маслиҳат мекардем, ки оё ин танқид бароямон иҷозат аст, ё не?!
Радиои Паём: Пас интиқоди боиҷозат ин чи интиқоде мешавад?
Шарофиддин Гадоев: Онҳо бо ин корашон мехостанд нишон диҳанд, ки дар Тоҷикистон сухан озод асту танқид кардан ҳеҷ мушкиле надорад.
Радиои Паём: Миш-мишҳое ҳастанд, ки гӯё кумитаи амнияти миллии Тоҷикистон барои пиёда кардани баъзе аз мақсадҳои худ ҳатто аз амалҳои фаҳш ҳам истифода мебарад ва ин таҷрибаро мо дар чанд соли охир дидем. Оё шумо аз ин қабил фаъолиятҳои кумита хабардор шудед? Оё ҳақиқат дорад, ё чи хеле худи намояндагони ин ниҳод мегӯянд, даст дар ин корҳо надоранду кори дигар нафарон аст, ки амалро анҷому расонаӣ мекунанд ба хотири мақсадҳои худ ва ба мақомот маълум ҳам нест?
Шарофиддин Гадоев: Ман аз ду амалиёт хабар дорам, ки яке “Ватан”, дигаре “Ватандор”ном дорад. Рӯзи 27-уми феврал ба ман лоиҳае пешниҳод карда буданд, ки дар мавриди гузаронидани ҷашни “Наврӯз” буд. Чорабиние, ки мегузашт бояд духтаронро омода мекарданд ва тавассути шахсони калидӣ аъзоёни Ҳизби Наҳзати Исломиро тавассути духтарон идора мекарданд ва ҳамон сабтҳои фаҳшоро месохтанд.
Радиои Паём: Аммо ҳамин сухани шумо ба назари ман шубҳаовар метобад. Чунки ҳамин Ҳизби Наҳзати Исломии Тоҷикистон, ки узви эътилофи Паймони Миллии Тоҷикистон аст, чандин нафарони аъзои ин ҳизб шаттаи ин ҳолатҳоро хӯрда буданд. Намояндагони мақомот то чи андоза ин корашонро ҳақ мешуморанд, ки дар ҳақиқат муваффақ мешаванд? Ҳол он ки ин аз таҷриба гузаштааст ва ҳама медонанд, ки чунин ҳолатҳо рух доданаш мумкин аст. Ба он духтарон чи гуна муяссар мешавад, ки бар дили фаъолони сиёсӣ ва ҷониби мухолиф раҳ ёбанд?
Шарофиддин Гадоев: Ин як роҳи ворид шудан ба бағали сиёсатмадорон ҳаст, буд ва хоҳад монд. Ҳар қадар ҳам эҳтиёткорона кор гирад , як рӯз ҳар нафар метавонад бар доми инҳо афтад. Ин таҷрибаро онҳо дар ҳама давру замон истифода бурданду хоҳанд бурд. ин тактикаҳо кӯҳна ҳам намешаванд ва мухолифине, ки дар ин бобат хонда бошанд, медонанд.
Радиои Паём: Вақте, ки дар Тоҷикистон ин гуна амалҳои ноҷо ҳатто дар расонаҳои давлатӣ, дар телевизионҳо намоиш дода мешуд, дар шабакаҳои иҷтимоӣ пахш мешуд, мақомот изҳори бехабарӣ мекарданд ва мегуфтанд, ки ин қабил наворҳоро кӣ сабт мекунад ва ки паҳн мекунад. Аммо аз рӯйи гуфтаҳои шумо чунин бармеояд, ки ин корҳо аз рӯйи амалиёт анҷом мешаванд?
Шарофиддин Гадоев: Бале, ин қабил корҳоро ҳам ВКД мекунад ва ҳам Кумитаи Амнияти Миллӣ. Ин роҳ барои шармсор кардани мардум аст ва мемонад. Ин кори дасти вазорати корҳои дохилии Тоҷикистон ва кумитаи амният аст ва кори дигарон нест. Ин куллан нодуруст аст, ки хабар надошта бошанд.
Радиои Паём: Чӣ гуна муяссар шуд, то аз Тоҷикистон берун бароед?
Шарофиддин Гадоев: Вақте, ки пурра ба бовариашон даромадам, дигар ба ман эътимод доштанд. Аз тарафи дигар фишори ҷомеаи ҷаҳонӣ ҳам буд, фишори созмонҳои байналмиллалӣ, фишори кишварҳои ғарбӣ буд. Аз ҷониби мухолифини давлати Тоҷикистон низ фишор буд, ки бо ҳам кор карданд ва таҳти ҳамин фишорҳо мақомоти Тоҷикистон маҷбур буданд, ки дигар маро аз он ҷо раҳо кунанд. Фикр карданд, ки ман баъди раҳоӣ ҳамроҳашон ҳамкорӣ мекунам ва содиқ мемонам. Ҳамин боварашон ҳам асос шуд, ки ман аз он ҷо берун шудам.
Радиои Паём: Лекин чандин нафароне, ки эълон карданд, ба хоҳиши худашон ба Тоҷикистон рафтанд, дар аксар корҳои сиёсии Тоҷикистон ҳамкорӣ карда истодаанд. Ҳатто мисли пешоҳанг фаъолият бурда истодаанд. Барои чи ба ягонтои онҳо муяссар нашудааст, ки аз Тоҷикистон берун шаванд?
Шарофиддин Гадоев: Хуб, ман як нафаре набудам, ки ноаён бошам ва қабл аз сафарам санаи 2-юми феврал дар мавриди роҳи Чаноқ- Душанбе сӯҳбат кардам. Яъне пурра маълум буд, ки бо хоҳиши худам нарафтам. Шояд он бачаҳое, ки рафтаанд бо хоҳиши худашон ҳам рафта бошанд. Вале нафароне, ки бо роҳи рабудан дар Тоҷикистон қарор доранд ва хоҳиши берун шудан доранд, метавонанд аз дохил ҳам садо баланд кунанд , то ҷомеаи ҷаҳонӣ барояшон кӯмаке анҷом диҳад. Шояд таҳти чунин фишорҳо онҳо ҳам тавонанд берун бароянд. Чун дар ин маврид тамоми созмонҳои байналмиллалӣ дастбакор шуданд, тамоми дипломатҳое, ки дар Тоҷикистон буданд, онҳо низ дастбакор шуданд. Ин як гапи майда ҳам набуд, зеро дар тамоми расонаҳои ҷаҳон баромада буд. Таҳқиқоти ин парвандаро худи кишвари Ҳолланд мебурд. Ҳукумати Тоҷикистон наметавонист гуноҳашро пинҳон кунаду гӯяд, ки мо инро надуздидем.
Радиои Паём: Айни ҳол масъалаи истирдоди иҷбории шумо ба Тоҷикистон дар Аврупо чи гуна баррасӣ шуда истодааст?
Шарофиддин Гадоев: Ин ҷо парвандаи ҷиноӣ боз шудааст ва таҳқиқот рафта истодааст. Ман фикр мекунам, ки ба ягон натиҷаҳои хуб ҳам расанд.
Радиои Паём: Шумо дар Аврупо ҳам бозпурсӣ шудед? Кадом ниҳодҳо сарукор доштанд бо пурсиш?
Шарофиддин Гадоев: Ҳамон ҳодисаҳое, ки бар сарам омад, пурсиданд.
Радиои Паём: Дар масъалаи аз Тоҷикистон баровардани шумо нақши кадом давлат боризтар буд?
Шарофиддин Гадоев: Ман фикр мекунам, ки нақши ҳамаи давлатҳои Аврупо бориз буд. ва бештари маълумотҳо тариқи вазорати корҳои хориҷаи Ҳолланд, ки сурат мегирифт, пайгириҳо низ аз тарафи ин давлат бештар буд. Онҳо бештар кӯшиш мекарданд, ки то дигар сафоратхонаҳоро ҳамоҳанг кунанд ва дар якҷоягӣ амал кунанд. Онҳо , кишварҳои Урупо одате доранд, ки бештар дастаҷамъона тасмим мегиранду фаъолият мебаранд дар дилхоҳ ҳолатҳое, ки ба вуҷуд меоянд. Ин ҷо сафоратхонаи Иёлоти Муттаҳидаи Амрико, намояндаи иттиҳоди Урупо дар Тоҷикистон дахолат карданд ва низ аз сафоратхонаи Олмон ва бисёр дигар ташкилотҳо.
Радиои Паём: Ҳамаи он нафароне, ки мухолифат пеш гирифтанду берун шуданду дар изҳороташон бо шабакаҳои иҷтимоӣ Тоҷикистонро мавриди танқид қарор медиҳанд, пайвандонашон дар Тоҷикистон мавриди шиканҷа ва фишор қарор мегиранд. Оё чунин муносибат бо пайвандони шумо ҳам буд? Баъди бозгашти шумо ба Аврупо ҳолашон чи гуна аст?
Шарофиддин Гадоев: Ҳукумати Тоҷикистон дар ҳолате қарор дорад, ки намехоҳад нисбати ман ягон сухани дигар дар расонаҳо пайдо шавад. Барои ҳамин ҳам нисбати аҳли хонаводаи ман ягон таҳдиду фишоре феълан дида намешавад.
Аз аввали берун шудани ман ҳам ҳар мушкиле бар сарашон ояд, аҳли хонаводаи ман ба расонаҳо муроҷиат мекунанд. Ба ҳамин хотир меҳаросанд, ки рафтанашон ба хонаи мо дар расонаҳо чоп мешавад ва бар зарари худашон кор гирифта мешавад.
Ҳамон нафароне, ки нисбаташон аз ҷониби мақомот зулм мешавад, бояд навор сабт кунанд, баъд онҳо ҳам метарсанд, ки ба хонаи як нафар биёянд.
Радиои Паём: Тавсияи шумо ба он нафароне, ки ба режими сиёсати имрӯзаи Тоҷикистон розӣ нестанд, чӣ аст?
Шарофиддин Гадоев: Тавсияи ман ин аст, ки ҳар касе ба роҳ баромад, дигар ба қафо нигоҳ накунад. Роҳи пешгирифтаашро то охир барад, натарсад. Агар шумо ҳар қадар тарсидед, бозистодед ва фикр кардед, ки агар ин корро накунед, режим ба шумо раҳм мекунад, хато мекунед. Ҳар қадаре тарсидед ва сар хам кардед, ҳамон қадар ин режим болои шумо савор мешавад ва зулм мекунад. Ба ҳамин хотир ҳам дигар ба ақиб қадам нагузоред. Як қадам ба ақиб равед, режим даҳ қадам пеш мегузарад.
Радиои Паём: Вақте ки шумо дар Тоҷикистон пайдо шудед, баъзеҳо гуфтанд, ки ман инро медонистам, ки ин хоин буд. Аз аввал маълум буд хиёнатҳояш ва ҳатман фурӯхта мешуд. Шумо чи гуна собит мекунед, ки онҳо нодуруст мегӯянд?
Шарофиддин Гадоев: Бо амал ин чизро собит кардам.
Радиои Паём: Шумо боздошту истирдод шудед, изҳорот додед, ки бо хоҳиши худатон баргаштед, бо хоҳиши онҳо бошад ҳам. Дар хонаатон оши худоӣ додед. Имрӯз боз баргаштед ба Аврупо ва дар Паймони Миллӣ боз ҳам дар баҳсҳои сиёсӣ иштирок доред. Локин чӣ метавонад собит кунад, ки шумо гумоштаи Тоҷикистон шуда наомадед ба Аврупо?
Шарофиддин Гадоев: Ман ҳеҷ гоҳ гумошта набудам, гумошта нахоҳам буд ва он чи имрӯз дорам, ошкоро барои мардум гуфта истодаам. мавқеямро ҳеҷ гоҳ тағйир надодаам. Дар кадом мавқе будам, ҳастам ва хоҳам монд. ман бо гап не, бо шубҳа не, бо амалам корамро тасдиқ мекунам.
Радиои Паём: Оё ҳамин хел ҳам шуданаш мумкин, ки Шарофиддин рӯзе пӯсти худашро иваз мекунад ва мегӯяд, ки ман барои вайрон кардани эътилофи Паймони Миллии Тоҷикистон аз Тоҷикистон омада будам.
Шарофиддин Гадоев: Ин имкон надорад. Ман ҳеҷ гоҳ хиёнат накардам ва нахоҳам кард, албатта то ба он даврае, ки ба ман хиёнат накунанд. Бо худораҳматӣ Умаралӣ Қувватов якҷоя аз Тоҷикистон баромадем ва то имрӯз дар он роҳе, ки Умаралӣ Кувватов интихоб карда буд, дар он роҳ ҳастам. Мо ҳеҷ вақт дар сиёсат бозингар набудем ва бо мардум бозӣ нахоҳем кард. Ҳар он чӣ ҳаст, ошкор барои Ватан, миллат, давлат хизмат мекунем. Манҳамчун як шаҳрванд, ҳамчун як инсон барои ватанам хизмат мекунам. Ман барои ягон гурӯҳе хизмат намекунам. Ҳар коре, ки мекунам барои Ватану миллат аст.
Радиои Паём: Мегӯянд, ки эътилофи Паймони Миллии Тоҷикистон як эътилофи сохта аст ва ба ҷуз Ҳизби Наҳзати Исломии Тоҷикистон он ҷо созмонҳои соҳибвазн нестанд.
Инро роҳбарияти Ҳизби Наҳзати Исломии Тоҷикистон танҳо ба хотири нишон додани чанд созмонҳо таъсис додаанд. Ва дигар созмонҳо мисли лӯхтак истифода мешаванд. Шумо ҳамчун роҳбари яке аз эътилофи Паймони Миллии Тоҷикистон ба ин суханҳо чи гуна вокуниш нишон медиҳед?
Шарофиддин Гадоев: Ин суханҳо асос надоранд. Мо аъзо ва тарафдорони худро дорем. Ҷунбиши Ислоҳот ва Рушди Тоҷикистон як ҷунбиши нав аст ва бо бачаҳое, ки бо як идеяҳои нав мехоҳанд ба сиёсат ворид шаванд, ҳамин бачаҳо шомили гурӯҳи моянд. Албатта имрӯз бархе аз онҳо дар расонаҳо чеҳраҳои худро боз накардаанд ва низ ҳастанд нафароне, ки фаъоланд дар расонаҳо. Як ҷумбиш ҳамин қадар метавонад фаъолият барад.
Радиои Паём: Гуфта метавонед, ки ҳудуди чанд нафар аъзо ва тарафдор доред?
Шарофиддин Гадоев: Ҳоло бештар аз сад нафар аъзо дорем. Тарафдорон бошанд, аз ҳазор боло аст шумораашон.
Радиои Паём: Ба наздикӣ дар сомонаи расмии Ислоҳот ва Рушди Тоҷикистон эълон шуд, ки мисли як зерсохтор созмоне ҳам бо номи “Ҳомиёни Ватан” таъсис ёфтааст. ин чи гуна созмон аст?
Шарофиддин Гадоев: Ин созмон нест. Ин як маркази ҳамоҳангсозии “Ҳомиёни Ватан” аст. Дар ин ҷо ҷавононро метавонем ба ҳайси волонтёр даъват кунем, то ҳамкорӣ дошта бошанд. Дар ин ҷо барои ҳар як ҷавон роҳ мекушоем, то ҷойгоҳи худро дар ҷомеа пайдо кунад. Агар аъзои ҷунбиш будан нахоҳанд ҳам, метавонанд бо дигар бачаҳо дар ҳамин марказ кору фаъолият баранд. Дар он ҷо дарсҳои забономӯзӣ ва дарсҳои сиёсӣ ташкил кардаем. Феълан пурра шакл нагирифтааст, аммо дар низомнома омадааст ва нақшаҳоямон бузург аст.
Радиои Паём: Марказатон “Ҳомиёни Ватан” ном гирифтааст. Шумо аз кӣ пуштибонӣ кардан мехоҳед Ватанро ?
Шарофиддин Гадоев: Аз ҳар нафаре, ки хиёнат мекунад. Манфиатҳои миллату давлати Тоҷикистонро нодида мегирад .
Радиои Паём: Яъне, ба ҷуз забономӯзӣ, дарси сиёсат ҳам меомӯзанд, чун номаш “Ҳомиёни Ватан” аст. Ба кадом мақсад меомӯзанд?
Шарофиддин Гадоев: Агар хоҳанд, корҳои сиёсӣ ҳам мебаранд ва агар нахоҳанд, метавонад танҳо дар корҳои фарҳангӣ шуғл варзанд . Масалан инсоне забонҳоро омӯхтан мехоҳад ва ягон бадие надорад, ки биёяду ҳамроҳ шавад.
Радиои Паём: Номи ин ташкилотатон характери сиёсӣ дорад ва чӣ гуна метавонад нафаре дар ин ҷо танҳо барои омӯзиши забону фарҳанг ояд?
Шарофиддин Гадоев: Масалан як нафар муаллими хубе ҳаст, ки бисёр забондон аст ва мехоҳад ба тоҷикон, ҳамватанони худаш хизмат кунад, забон омӯзонад. Метавонад ҳар ҳафтае чор соат дарс гӯяд, пас ин имконият барояш фароҳам мешавад. Ман мехоҳам дар он ҷо як курс ташкил кунам, то онҳо тавонанд, ки ворид шаванду курси омӯзиширо гузаранд. Боз масалан бачаҳои ҷавонро ҷамъ мекунему аз хатарҳои терроризму экстремизм огоҳ мекунем ва аз ин роҳ бармегардонем. Яъне мо таблиғ мекунем, ки мардум ба роҳҳои терроризму экстремизм даст назананд. Албатта ин як хизмат ҳам, ҳимоят ҳам ҳаст барои халқи тоҷик.
Радиои Паём: Имрӯзҳо кадом амалеро мехостед анҷом диҳед, аммо дар роҳандозиаш душворӣ кашида истодаед. Афсӯс мехӯред, ки татбиқ нашуда истодааст. Оё дар шумо ҳамин гуна эҳсос ҳам вуҷуд дорад?
Шарофиддин Гадоев: Бузургтарин хоҳиши ман имрӯз иттиҳоди тоҷикони чи дар дохил ва чи дар хориҷи кишвар аст. мехоҳам бо ҳам оянд.
Радиои Паём: Оё заминаи боҳам омадани мардум, хусусан фаъолони сиёсӣ вуҷуд дорад?
Шарофиддин Гадоев: Фикр мекунам,ки дорад. Зеро агар ин ҳукумат тавонистааст, ки дар тӯли 27 сол мардумро кӯча ба кӯча, шаҳр ба шаҳр минтақа ба минтақа пароканда кардааст, пас ҳамин душманро бояд бартараф кард. Моро пароканда карда бо тактикаи душманони пешинаи халқи тоҷик заминҳоро азхуд карда як давлати бузургро ба як ҳукумати авлодии хурд табдил додааст.
Сӯҳбаторо Шавкати Муҳаммад